[88] (1) Habēs, Aemiliāne, causam tōtam, cūr tabulae nuptiālēs inter mē ac Pudentillam nōn in oppidō sint sed in vīllā suburbānā cōnsignātae: nē quīnquāgintā mīlia nummum dēnuō profundenda essent nec tēcum aut apud tē cēnandum. Estne causa idōnea?
(2) Mīror tamen quod tū ā vīllā tantopere abhorreās, quī plērumque rūre versēre. (3) Lēx quidem Iūlia dē marītandīs ōrdinibus nusquam suī ad hunc modum interdīcit: 'uxōrem in villā nē dūcitō.' (4) Immō, sī vērum velīs, uxor ad prōlem multō auspicātius in vīllā quam in oppidō dūcitur, in solō ūberī quam in locō sterilī, in agrī caespite quam in forī silice. (5) Māter futūra in ipsō māternō sinū nūbat, in segete adultā, super fēcundam glēbam, vel enim sub ulmō marītā cubet, in ipsō gremiō terrae mātris, inter subolēs herbārum et propāginēs vītium et arborum germina. (6) Ibi et ille celeberrimus in cōmoediīs versus dē proximō congruit:
παίδων ἐπ’ ἀρότῳ, γνησίων ἐπὶ σπορᾷ.
(7) Rōmānōrum etiam maiōribus Quīntīs et Serrānīs et multīs aliīs similibus nōn modo uxōrēs, vērum etiam cōnsulātūs et dictātūrae in agrīs offerēbantur. Cohibēam mē in tam prōlixō locō, nē tibi grātum faciam, sī vīllam laudāverō.