[103] (1) Quīn igitur addis: 'reum magistrum, reum vitricum, reum dēprecātōrem'? Sed quid deinde? 'Plūrimōrum maleficiōrum et manifēstissimōrum'. Cedo ūnum dē plūrimīs, cedo dubium vel saltem obscūrum dē manifēstissimīs.
(2) Cēterum ad haec, quae obiēcistis, numerā an bīnīs verbīs respondeam. 'Dentēs splendidās': ignōsce munditiīs. 'Specula īnspicis': dēbet philosophus. 'Versūs facis': licet fierī. 'Piscēs explōrās': Aristotelēs docet. 'Lignum cōnsecrās': Platō suādet. (3) 'Uxōrem dūcis': lēgēs iubent. 'Prior nātū'st': solēt fierī. 'Lucrum sectātū's': dōtālēs accipe, dōnātiōnem recordāre, testāmentum lege.
(4) Quae sī omnia affatim retudī, sī calumniās omnēs refūtāvī, sī mē in omnibus nōn modo crīminibus, vērum etiam maledictīs procul ā culpā tūtus sum, sī philosophiae honōrem, quī mihi salūte meā antīquior est, nusquam minuī, immō contrā ubīque sī cum septem pennīs eum tenuī: (5) sī haec, ut dīcō, ita sunt, possum sēcūrus exīstimātiōnem tuam reverērī quam potestātem verērī, quod minus grave et verendum mihi arbitror ā prōcōnsūle damnārī quam sī ā tam bonō tamque ēmendātō virō improber.
Dīxī.