[89] (1) Dē aetāte vērō Pudentillae, dē quā post ista satis cōnfīdenter mentītus es, ut etiam sexāgintā annōs nātam dīcerēs nubsisse, dē eā tibi paucīs respondēbō: nam necesse nōn est in rē tam perspicuā plūribus disputāre.
(2) Pater eius nātam sibi fīliam mōre cēterōrum professus est. Tabulae eius partim tabulāriō pūblicō, partim domō adservantur, quae iam tibi ob os obiciuntur. (3) Porrige tū Aemiliānō tabulās istās: līnum cōnsīderet, signa quae impressa sunt recognōscat, cōnsulēs legat, annōs computet, quōs sexāgintā mulierī adsignābat. (4) Probet quīnque et quīnquāgintā: lūstrō mentītus sit. Parum hoc est, līberālius agam; nam et ipse Pudentillae multōs annōs largītus est. Redōnābō igitur vicissim decem annōs: Mezentius cum Ulixe errāvit. Quīnquāgintā saltem annōrum mulierem ostendat.
(5) Quid multīs? Ut cum quadruplātōre agam, bis duplum quīnquennium faciam, vīgintī annōs semel dētraham. Iubē, Maxime, cōnsulēs computārī. Nisi fallor, inveniēs nunc Pudentillae haud multō amplius quadrāgēnsimum annum aetātis īre. (6) Ō falsum audāx et nimium! Ō mendācium vīgintī annōrum exiliō pūniendum! Dīmidiō tanta, Aemiliāne, mentīris, falsa audēs sesquealtera. Sī trīgintā annōs prō decem dīxissēs, possēs vidērī computātiōnis gestū errāsse, quōs circulāre dēbueris digitōs aperuisse. (7) Cum vērō quadrāgintā, quae facilius cēterīs porrēctā palmā significantur, ea quadrāgintā tū dīmidiō augēs, nōn potes digitōrum gestū errāsse, nisi forte trīgintā annōrum Pudentillam ratus bīnōs cuiusque annī cōnsulēs numerāstī.