15.38

[1] Sequitur clādēs, forte an dolō prīncipis incertum (nam utrumque auctōrēs prōdidēre), sed omnibus quae huic urbī per violentiam ignium accidērunt gravior atque atrōcior. [2] initium in eā parte circī ortum quae Palātīnō Caeliōque montibus contigua est, ubi per tabernās, quibus id mercimōnium inerat quō flamma alitur, simul coeptus ignis et statim validus ac ventō citus longitūdinem circī corripuit. neque enim domus mūnīmentīs saeptae vel templa mūris cīncta aut quid aliud morae interiacēbat. [3] impetū pervagātum incendium plāna prīmum, deinde in ēdita adsurgēns et rūrsus īnferiōra populandō, antiit remedia vēlōcitāte malī et obnoxiā urbe artis itineribus hūcque et illūc flexīs atque ēnormibus vīcīs, quālīs vetus Rōma fuit. [4] ad hoc lāmenta paventium fēminārum, fessa aetāte aut rudis pueritiae, quīque sibi quīque aliīs cōnsulēbant, dum trahunt invalidōs aut opperiuntur, pars mōra, pars festīnāns, cūncta impediēbant. [5] et saepe dum in tergum respectant lateribus aut fronte circumveniēbantur, vel sī in proxima ēvāserant, illīs quoque ignī correptīs, etiam quae longinqua crēdiderant in eōdem cāsū reperiēbant. [6] postrēmō, quid vītārent quid peterent ambiguī, complēre viās, sternī per agrōs; quīdam āmissīs omnibus fortūnīs, diurnī quoque victūs, aliī cāritāte suōrum, quōs ēripere nequīverant, quamvīs patente effugiō interiēre. [7] nec quisquam dēfendere audēbat, crēbrīs multōrum minīs restinguere prohibentium, et quia aliī palam facēs iaciēbant atque esse sibi auctōrem vōciferābantur, sīve ut raptus licentius exercērent seu iussū.

Horizontal Tabs

article Nav
Previous: 
Next: 

Suggested Citation

Mathew Owen and Ingo Gildenhard, Tacitus, Annals, 15.20–23, 33–45. Cambridge: Open Book Publishers, 2013. ISBN: 978-1-78374-003-1. DCC edition, 2016. http://dcc.dickinson.edu/tacitus-annals/15-38