Vergil, Aeneid IV 31-53

Anna refert: 'Ō lūce magis dīlēcta sorōrī,

sōlane perpetuā maerēns carpēre iuventā

nec dulcēs nātōs Veneris nec praemia nōris?

Id cinerem aut Mānēs crēdis cūrāre sepultōs?

Estō: aegram nūllī quondam flexēre marītī,35

nōn Libyae, nōn ante Tyrō; dēspectus Iärbās

ductōrēsque aliī, quōs Āfrica terra triumphīs

dīves alit: placitōne etiam pugnābis amōrī?

Nec venit in mentem quōrum cōnsēderis arvīs?

Hinc Gaetūlae urbēs, genus īnsuperābile bellō,40

et Numidae īnfrēnī cingunt et inhospita Syrtis;

hinc dēserta sitī regiō lātēque furentēs

Barcaeī. Quid bella Tyrō surgentia dīcam

germānīque minās?

Dīs equidem auspicibus reor et Iūnōne secundā45

hunc cursum Īliacās ventō tenuisse carīnās.

Quam tū urbem, soror, hanc cernēs, quae surgere rēgna

coniugiō tālī! Teucrum comitantibus armīs

Pūnica sē quantīs attollet glōria rēbus!

Tū modo posce deōs veniam, sacrīsque litātīs50

indulgē hospitiō causāsque innecte morandī,

dum pelagō dēsaevit hiems et aquōsus Orīōn,

quassātaeque ratēs, dum nōn tractābile caelum.'

Horizontal Tabs

article Nav

Suggested Citation

Christopher Francese and Meghan Reedy, Vergil: Aeneid Selections. Carlisle, Pennsylvania: Dickinson College Commentaries, 2016. ISBN: 978-1-947822-08-5. http://dcc.dickinson.edu/vergil-aeneid/vergil-aeneid-iv-31-53