At pater Anchīsēs penitus convalle virentī
inclūsās animās superumque ad lūmen itūrās680
lūstrābat studiō recolēns, omnemque suōrum
forte recēnsēbat numerum, cārōsque nepōtēs
fātaque fortūnāsque virum mōrēsque manūsque.
Isque ubi tendentem adversum per grāmina vīdit
Aenēān, alacris palmās utrāsque tetendit,685
effūsaeque genīs lacrimae et vōx excidit ōre:
'Vēnistī tandem, tuaque exspectāta parentī
vīcit iter dūrum pietās? Datur ōra tuērī,
nāte, tua et nōtās audīre et reddere vōcēs?
Sīc equidem dūcēbam animō rēbarque futūrum690
tempora dīnumerāns, nec mē mea cūra fefellit.
Quās ego tē terrās et quanta per aequora vectum
accipiō! quantīs iactātum, nāte, perīclīs!
Quam metuī nē quid Libyae tibi rēgna nocērent!'
Ille autem: 'Tua mē, genitor, tua trīstis imāgō695
saepius occurrēns haec līmina tendere adēgit;
Stant sale Tyrrhēnō classēs. Dā iungere dextram,
dā, genitor, tēque amplexū nē subtrahe nostrō.'
Sīc memorāns largō flētū simul ōra rigābat.
Ter cōnātus ibī collō dare bracchia circum;700
ter frūstrā comprēnsa manūs effūgit imāgō,
pār levibus ventīs volucrīque simillima somnō.
notes
4th/5th c. MS of 6.688 ff.: http://www.e-codices.unifr.ch/en/csg/1394/28/0/Sequence-748