Tum pius Aenēās strictō sīc ēnse precātur:175
'Estō nunc Sōl testis et haec mihi Terra vocantī,
quam propter tantōs potuī perferre labōrēs,
et pater omnipotēns et tū Sāturnia coniūnx
(iam melior, iam, dīva, precor), tūque inclute Māvors,
cūncta tuō quī bella, pater, sub nūmine torquēs;180
fontīsque fluviōsque vocō, quaeque aetheris altī
rēligiō et quae caeruleō sunt nūmina pontō:
cesserit Ausoniō sī fors victōria Turnō,
convenit Euandrī victōs discēdere ad urbem,
cēdet Iūlus agrīs, nec post arma ūlla rebellēs185
Aeneadae referent ferrōve haec rēgna lacessent.
sīn nostrum adnuerit nōbīs Victōria Martem
(ut potius reor et potius dī nūmine fīrment),
nōn ego nec Teucrīs Italōs pārēre iubēbō
nec mihi rēgna petō: paribus sē lēgibus ambae190
invictae gentēs aeterna in foedera mittant.
sacra deōsque dabō; socer arma Latīnus habētō,
imperium sollemne socer; mihi moenia Teucrī
cōnstituent urbīque dabit Lāvīnia nōmen.'