Χρύσιππος
ὃ δὲ μέγιστον, ἢν ἐθέλω, τάχιστά σε ἀποδείξω λίθον.
Ἀγοράστης
πῶς λίθον; οὐ γὰρ Περσεὺς σύ, ὦ βέλτιστε, εἶναί μοι δοκεῖς.
Χρύσιππος
ὧδέ πως· ὁ λίθος σῶμά ἐστι;
Ἀγοράστης
ναί.
Χρύσιππος
τί δέ; τὸ ζῷον οὐ σῶμα;
Ἀγοράστης
ναί.
Χρύσιππος
σὺ δὲ ζῷον;
Ἀγοράστης
ἔοικα γοῦν.
Χρύσιππος
λίθος ἄρα εἶ σῶμα ὤν.
Ἀγοράστης
μηδαμῶς. ἀλλ᾽ ἀνάλυσόν με πρὸς τοῦ Διὸς καὶ ἐξ ὑπαρχῆς ποίησον ἄνθρωπον.
Χρύσιππος
οὐ χαλεπόν· ἀλλ᾽ ἔμπαλιν ἴσθι ἄνθρωπον· εἰπὲ γάρ μοι, πᾶν σῶμα ζῷον;
Ἀγοράστης
οὔ.
Χρύσιππος
τί δέ; λίθος ζῷον;
Ἀγοράστης
οὔ.
Χρύσιππος
σὺ δὲ σῶμα εἶ;
Ἀγοράστης
ναί.
Χρύσιππος
σῶμα δὲ ὢν ζῷον εἶ;
Ἀγοράστης
ναί.
Χρύσιππος
οὐκ ἄρα λίθος εἶ ζῷόν γε ὤν.
Ἀγοράστης
εὖ γε ἐποίησας, ὡς ἤδη μου τὰ σκέλη καθάπερ τῆς Νιόβης ἀπεψύχετο καὶ πάγια ἦν. ἀλλὰ ὠνήσομαί γε σέ. πόσον ὑπὲρ αὐτοῦ καταβαλῶ;
Ἑρμῆς
μνᾶς δώδεκα.
Ἀγοράστης
λάμβανε.
Ἑρμῆς
μόνος δὲ αὐτὸν ἐώνησαι;
Ἀγοράστης
μὰ Δί᾽, ἀλλ᾽ οὗτοι πάντες οὓς ὁρᾷς.
Ἑρμῆς
πολλοί γε καὶ τοὺς ὤμους καρτεροὶ καὶ τοῦ θερίζοντος ἄξιοι.
vocabulary
ἀποδείκνυμι: make, render; point out, display
Περσεύς, -έως, ὁ: Perseus, the Greek hero who turned his enemies to stone using the severed head of Medusa
μηδαμῶς: (adv.) not at all
ἀναλύω: release
ὑπαρχή, -ῆς, ἡ: beginning
ἔμπαλιν: (adv.) back, back again
σκέλος, -ους, τό: leg
Νιόβη, -ης, ἡ: Niobe
ἀποψύχω: chill, cool
πάγιος, -α, -ον: solid, firm
ὠνέομαι: buy, purchase
πόσον: how much?
καταβάλλω: pay
ὦμος, ὤμου, ὁ: shoulder
θερίζω: to reap, mow
καρτερός, -ή, -όν: strong