M. At nōs hinc aliī sitientīs ībimus Afrōs,
pars Scythiam et rapidum crētae veniēmus Oaxen65
et penitus tōtō dīvīsōs orbe Britannōs.
ēn umquam patriōs longō post tempore fīnīs
pauperis et tugurī congestum caespite culmen,
post aliquot, mea rēgna, vidēns mīrābor aristās?
impius haec tam culta novālia mīles habēbit,70
barbarus hās segetēs. ēn quō discordia cīvīs
prōdūxit miserōs: hīs nōs cōnsēvimus agrōs!
īnsere nunc, Meliboee, pirōs, pōne ōrdine vītēs.
īte meae, felix quondam pecus, īte capellae.
nōn ego vōs posthac viridī prōiectus in antrō75
dūmōsā pendēre procul dē rūpe vidēbō;
carmina nūlla canam; nōn mē pāscente, capellae,
flōrentem cytisum et salicēs carpētis amārās.
T. Hīc tamen hanc mēcum poterās requiēscere noctem
fronde super viridī: sunt nōbīs mītia pōma,80
castaneae mollēs et pressī cōpia lactis,
et iam summa procul vīllārum culmina fūmant
māiōrēsque cadunt altīs dē montibus umbrae.
notes
notes go here
vocabulary
vocab goes here