Postquam altum tenuēre ratēs nec iam amplius ūllae
appārent terrae, caelum undique et undique pontus,
tum mihi caeruleus suprā caput astitit imber
noctem hiememque ferēns, et inhorruit unda tenebrīs.195
Continuō ventī volvunt mare magnaque surgunt
aequora, dispersī iactāmur gurgite vāstō;
Involvēre diem nimbī et nox ūmida caelum
abstulit, ingeminant abruptīs nūbibus ignēs,
Excutimur cursū et caecīs errāmus in undīs.200
Ipse diem noctemque negat discernere caelō
nec meminisse viae mediā Palinūrus in undā.
Trīs adeō incertōs caecā cālīgine sōlēs
errāmus pelagō, totidem sine sīdere noctēs.
quārtō terra diē prīmum sē attollere tandem205
vīsa, aperīre procul montīs ac volvere fūmum.
Vēla cadunt, rēmīs īnsurgimus; haud mora, nautae
adnīxī torquent spūmās et caerula verrunt.
Servātum ex undīs Strophadum mē lītora prīmum
excipiunt. Strophades Grāiō stant nōmine dictae210
īnsulae Īoniō in magnō, quās dīra Celaenō
Harpyïaeque colunt aliae, Phīnēïa postquam
clausa domus mēnsāsque metū līquēre priōrēs.
Trīstius haud illīs mōnstrum, nec saevior ūlla
pestis et īra deum Stygiīs sēsē extulit undīs.215
Virgineī volucrum vultūs, foedissima ventris
prōluviēs uncaeque manūs et pallida semper
ōra famē.
Hūc ubi dēlātī portūs intrāvimus, ecce
laeta boum passim campīs armenta vidēmus220
caprigenumque pecus nūllō custōde per herbās.
Inruimus ferrō et dīvōs ipsumque vocāmus
in partem praedamque Iovem; tum lītore curvō
exstruimusque torōs dapibusque epulāmur opīmīs.
At subitae horrificō lāpsū dē montibus adsunt225
Harpyïae et magnīs quatiunt clangōribus ālās,
dīripiuntque dapēs contāctūque omnia foedant
immundō; tum vōx taetrum dīra inter odōrem.
Rūrsum in sēcessū longō sub rūpe cavātā
[arboribus clausam circum atque horrentibus umbrīs]230
īnstruimus mēnsās ārīsque repōnimus ignem;
rūrsum ex dīversō caelī caecīsque latebrīs
turba sonāns praedam pedibus circumvolat uncīs,
polluit ōre dapēs. Sociīs tunc arma capessant
ēdīcō, et dīrā bellum cum gente gerendum.235
Haud secus ac iussī faciunt tēctōsque per herbam
dispōnunt ēnsīs et scūta latentia condunt.
Ergō ubi dēlāpsae sonitum per curva dedēre
lītora, dat signum speculā Mīsēnus ab altā
aere cavō. invādunt sociī et nova proelia temptant,240
obscēnās pelagī ferrō foedāre volucrīs.
sed neque vim plūmīs ūllam nec vulnera tergō
accipiunt, celerīque fugā sub sīdera lāpsae
sēmēsam praedam et vēstīgia foeda relinquunt.
Ūna in praecelsā cōnsēdit rūpe Celaenō,245
īnfēlīx vātēs, rumpitque hanc pectore vōcem;
'Bellum etiam prō caede boum strātīsque iuvencīs,
Lāomedontiadae, bellumne īnferre parātis
et patriō Harpyïās īnsontīs pellere rēgnō?
Accipite ergō animīs atque haec mea fīgite dicta,250
quae Phoebō pater omnipotēns, mihi Phoebus Apollō
praedīxit, vōbīs Furiārum ego maxima pandō.
Ītaliam cursū petitis ventīsque vocātīs:
ībitis Ītaliam portūsque intrāre licēbit.
sed nōn ante datam cingētis moenibus urbem255
quam vōs dīra famēs nostraeque iniūria caedis
ambēsās subigat mālīs absūmere mēnsās.'
notes
4th/5th c. MS of 210 ff.: http://www.e-codices.unifr.ch/en/csg/1394/15/0/Sequence-748