At pater Aenēās nōndum certāmine missō545
custōdem ad sēsē comitemque impūbis Iǖlī
Ēpytidēn vocat, et fīdam sīc fātur ad aurem:
'Vāde age et Ascaniō, sī iam puerīle parātum
agmen habet sēcum cursūsque īnstrūxit equōrum,
dūcat avō turmās et sēsē ostendat in armīs550
dīc' ait. Ipse omnem longō dēcēdere circō
īnfūsum populum et campōs iubet esse patentīs.
Incēdunt puerī pariterque ante ōra parentum
frēnātīs lūcent in equīs, quōs omnis euntīs
Trīnacriae mīrāta fremit Trōiaeque iuventūs.555
Omnibus in mōrem tōnsā coma pressa corōnā;
cornea bīna ferunt praefīxa hastīlia ferrō,
pars lēvīs umerō pharetrās; it pectore summō
flexilis obtortī per collum circulus aurī.
Trēs equitum numerō turmae ternīque vagantur560
ductōrēs; puerī bis sēnī quemque secūtī
agmine partītō fulgent paribusque magistrīs.
Ūna aciēs iuvenum, dūcit quam parvus ovantem
nōmen avī referēns Priamus, tua clāra, Polītē,
prōgeniēs, auctūra Italōs; quem Thrācius albīs565
portat equus bicolor maculīs, vēstīgia prīmī
alba pedis frontemque ostentāns arduus albam.
alter Atys, genus unde Atiī dūxēre Latīnī,
parvus Atys puerōque puer dīlēctus Iǖlō.
extrēmus fōrmāque ante omnīs pulcher Iǖlus570
Sīdoniō est invectus equō, quem candida Dīdō
esse suī dederat monimentum et pignus amōris.
Cētera Trīnacriīs pūbēs seniōris Acestae
fertur equīs.